ST. STEPHANUS-ALTAAR IN DE
KERK TE DALFSEN.
Ick Egbert Hake van den Ruitenberge make cundich allen luiden dat vor my is gecomen Goeswin van den Velde ende Aleit sin echte wyff ende gelyeden daer dat se hebt gegeven van der hant erfflich ende ummermer voer oer ziel ende voer alle oerer older ziel in een recht ewelic testement in ehre ons heren Gods ende zynre lieven moder Marien int altare des goeden sunte Stephans in der kercken to Dalvessen tot behoeff vicarius desselven altaers een mudde roggen by Swoller maete, dat jarlix toe betaelen ende to boeren gelyck pacht up sunte Peters dach ad cathedram uth oren erve ende goede ten Velde, soe wer dat gelegen is in der buirschap to Anken mitt alle sinen tobehore, ende hebt dat vorss. mudde roggen upgelaten erfflic als by minen consente ende todoen van mine erfgenamen in hant heren Rotgers van Buize preisters toe behoeff vicarius des vorss. altars als voer oeren rechten leenhern des vo[rss. g]uedes. Ende voer Ern: laeveden se oic eemparlic vicarius desselven altars de vorss. jargelds als des mudde roggen rechte warschap te doene uth den vorss. erve gelykerwys als uth een vry edel eegen goede, vry ende commerloes voer sie, voer alle oere erffgenamen, voer lehnheren ende vor alle degene, de des to
rechte komen willen also ducke als hem des behoeff is, woe men erffpacht in een ewich testament gelyck een vry eegen to rechte waeren sall sonder enigerhande ansprake, ende wat schaeden cost ende onraedt vicarius des vorss. altaers dar aff ledde oft dar by neme, den sollen Goswin ende Aleyt vorss. ende ore rechte erffgenamen ende wie bruiker is des vorss. erves alss sie twe verwilcurt hebt vor my, hem verrichten eene ellic voer all sonder enich wederseggen ende werweigeringe oft pantweringe, alle arge list uthgespraken. In orkunt deses brieffs besegelt mit minen segel omme bede wille Goswins ende Aleyth vorss. als een leenher vor my, vor mine broderen ende voer alle onse erffgenamen, ende omme merre vessniss heb ick Goswin vorss. min segel mede gehangen an dessen brieff vor ons ende vor alle onse erffgenamen in een recht tuich aller deser vorss. dingen int jar ons heren duisent driehondert tseventich ende een, op sunte Leonardus dach, ende was de principaell geschreven in franchine ende versegelt met twee uthangende segels in groenen wasse,
ende is dese copie mitten vorn. principale collationert ende accordert dor my Herm.
Wesselinck richter substituut tot Dalfzen (met paraaf, 1620).
Het erf ten Velde was leenroerig aan het huis Zuythem en de bovengenoemde Egbert Hake van den Ruitenberge eertijds de leenheer. Bovenstaand stuk bevindt zich in de collectie Heerkens ten Rijksarchieve in Overijssel.
A. HAGA.