Vonnis tegen een lasteraar, 1486

[pag. 27]

VONNIS TEGEN EEN LASTERAAR, 1486.

_______

Anno domini millesimo quadringentesimo lxxxvj.

                                                                                                                        vij Junij.
     Dyrck van Allenkercken, want hie oneerbaren, scantlycken woirden op Johan Wenemers huysffrouwe gesproken ende gekalt hefft ende oir alsoe vermyts loegentaligen woirden oir guede geruchte gekrencket ende benomen hefft, twelke die Raet wt gueder mannen ende vrouwen tuychnisse, die dat gerichtlyken besworen hebben gevonden hefft, Dyrck voirgen. op Johans vorisz. huysfrouwe alsulke oneerlyke woirde gesproken hefft, Soe hebben Scepenen ende Raet gewyset ende wysen dat Dyrck aldus sal openbair syne penitencie dair voir doen ende sie alsoe weder jn oire eere zetten ende alsus den borgermeister offte secretario naeseggen:
     Alle die oneertyke woirde die jck jn eniger wys van Johan Wenemerss huysfrouwe heymelick off openbair gekalt ende gesproken hebbe, die hebbe jck altoesamen versiert ende synt logentalich ende onwairachtich ende hebbe dair noch well noch wair an gesecht, mer gelogen ende myt logentaell ouerbedichtet ende ouergesecht. Ende cloppe die altoe samen jn mynen mont, ene werue, ander werue ende derde werue. Ende bekenne dat jck dair niet well noch wair, mer als een schalck an gedaen hebbe, want ick van hair anders niet en weet dan van ene guede vrouwe.
     Ende bidde voirt den Eerbaeren Raet van Campen, der vrouwen voirsz. ende alle oeren vrende, mannen ende vrouwen, dat sie my dit omme die mynne van Gode wyllen vergeuen ende sodane woirden voirt voir logen ende onwairachtich holden ende achten wyllen.
     Voirt soe sall Dyrck voirsz. dair toe drie Sonnendagen ene bernende wasskeerse van iij q myt onbedeckeden hoeuede ende bervoets voir die processie dragen ende voirt voir dat Hillige Sacramente offeren ende alsoe openbair penitencie doen.

[pag. 28]

     Voirt lat die Raet warnen alle borger ende guede lude dat sy Dyrck voirsz nae dessen dage voir ghienen gueden man achten noch holden en sullen, mer voir enen beruchtegeden, onwairachtigen boeuen. Ende sall voirt nae dessen dage ghiene tuychnisse mogen doen noch voir ghienen gueden manne jn enigen saken mogen staen.
                    Desse sententie en is tegens Dyrck voirsz. niet ver-
                    volget noch hem niet voirgelesen, mer js voiruluchtigh
                    geworden doe hie syn antwort ontfangen solde ende
                    bleeff then Broederen jn die kercke.

                                                                                     MR. J. NANNINGA UITTERDIJK.

Category(s): Kampen
Tags: , ,

Comments are closed.